ပၼ် (သထၼ) ၵူၼ်းၶဝ်ႈမိူင်းထႆး လူၺ်ႈမၢႆမီႈ 4 ၸုမ်း တၢမ်းၼင်ႇမတ်ႉတီႇၶေႃႈပိုၼ်ၽၢဝ်ႇ ၵသျုင်းမႁၢတ်ႇထႆး၊ ပိုတ်ႇပၼ် တႃႇယိုၼ်ႈယွၼ်း (သထၼ)လႆႈ ၸုမ်းသဵၼ်း 4 ၸုမ်း။

ၵူၼ်းၶဝ်ႈမႃးယူႇၼႂ်းမိူင်းထႆး ဢၼ်ၸၢင်ႈယိုၼ်ႈယွၼ်း (သထၼ) 4 ၸုမ်း

ၸုမ်း မၢႆ (1) သျူၼ်းၵုမ်ႇၼွႆႉ 19 ၵုမ်ႇ (ၶဝ်ႈမႃးယူႇၼႂ်းမိူင်းထႆး ၵွၼ်ႇ ဝၼ်းထီႉ 30/09/1999)။

ၸုမ်း မၢႆ (2) လုၵ်ႈဢွၼ်ႇႁဵၼ်း ဢၼ်ၶိုၼ်ႈႁဵၼ်းယဝ်ႉ။

ၸုမ်း မၢႆ (3) လုၵ်ႈဢွၼ်ႇၽၢၼ်ပေႃႈမႄႈ။

ၸုမ်း မၢႆ (4) ၵူၼ်းၸိူဝ်းႁဵတ်းပၼ် ၽွၼ်းပၢင်ႈမိူင်းထႆး လႄႈ မႃးယူႇၼႂ်းမိူင်းထႆးႁိုင်ယဝ်ႉ။ (ၸုမ်းမၢႆ 2/3/4 ၶဝ်ႈမႃးၼႂ်းမိူင်းထႆး ၵွၼ်ႇဝၼ်းထီႉ 18/01/2005)။

တူဝ်ယၢင်ႇ - ႁူဝ် 6 ၸုမ်း 50 -72 လႄႈ ႁူဝ် 0 ၸုမ်း89 ၸိူဝ်းၼႆႉ။

ၶေႃႈဢၼ်တေလႆႈမီး

1. ဢမ်ႇၸၢင်ႈပွၵ်ႈမိူဝ်း ယူႇသဝ်းၶိုၼ်းတီႈမိူင်းၵိူတ်ႇ။
2. မီးတီႈယူႇတၼ်းသဝ်း လႄႈ ယူႇမႃးၼႂ်းမိူင်းထႆးၶၢဝ်းယၢဝ်းႁိုင် (တီႈတႅမ်ႇ 15 ပီ)။
3. မီးၸိုဝ်ႈဝႆႉ ၼႂ်းသဵၼ်ႈမၢႆႁူဝ်ႁိူၼ်းၼႂ်းမိူင်းထႆး လႄႈ မီးမၢႆၵပ်းတူဝ် 13တူဝ်။ (မိူၼ်ၼင်ႇ ႁူဝ် 6 ဢမ်ႇၼၼ် ႁူဝ် 0)
4. ဢမ်ႇပႆႇမီးဝႂ်တၢင်ႇၸိူဝ်ႉၸၢတ်ႈ/ဢမ်ႇၶဝ်ႈၼႂ်းသဵၼ်ႈမၢႆၾၢင်မိူင်းလႂ်။
5. မီးသတ်ႉၸႃႇတေႃႇၽႅၼ်ႇလိၼ်ထႆး။
6. မီးၾိင်ႈတိုဝ်းၵမ်၊ ၾိင်ႈယၢမ်ႈလီ။ သင်ဝႃႈယၢမ်ႈလႆႈတူၵ်းၶွၵ်ႈ မီးသဵၼ်ႈၸိုဝ်ႈၶတီႊတၢင်းၽိတ်းၼႆ၊ တေလႆႈဢွၵ်ႇၶွၵ်ႈ ဢမ်ႇၼၼ် ပူၼ်ႉၶတီႊယဝ်ႉ ဢမ်ႇတႅမ်ႇၵႂႃႇ 5 ပီ။ (သင်ပဵၼ်ၶတီႊတၢင်းၽိတ်းႁဵတ်းဢွၵ်ႇ လႄႈ ၵႃႉၶၢႆယႃႈမဝ်းၵမ်ၼႆ ပူၼ်ႉၶတီႊယဝ်ႉ ဢမ်ႇတႅမ်ႇၵႂႃႇ 10 ပီ)

ၶၵ်ႉတွၼ်ႈၶၢဝ်းယၢမ်း ဢၼ်လႆႈမၵ်းမၼ်ႈဝႆႉ

1. ႁၢင်ႈႁႅၼ်းဢေႇၵသၢၼ်လၵ်းထၢၼ်သေ ယိုၼ်ႈႁင်းၵူၺ်း။
2. ဢမ်းၽိူဝ်း/ လုမ်းၾၢႆႇႁူမ်ႇလူမ်ႈၼႂ်းမိူင်း (ဢိင်ၼိူဝ်လွင်ႈတၢင်း) တေၵူတ်ႇထတ်း ဢေႇၵသၢၼ် လၵ်းထၢၼ် ၼႂ်းၶၢဝ်းတၢင်း (1) ဝၼ်း။
3. ၽူႈၵွၼ်းႁူင်းပလိၵ်ႈ တေဢွၵ်ႇပၼ်ဝႂ်ႁပ်ႉႁွင်းလွင်ႈတိုဝ်းၵမ်။
4. ၼၢႆးဢမ်းၽိူဝ်း/ ၽူႈၵွၼ်းႁူင်းပလိၵ်ႈ တေထတ်းထွင်ၼႂ်း ၶၢဝ်းတၢင်း (3) ဝၼ်း။
5. ၽိူမ်ႉထႅမ်သၢႆမၢႆၸိုဝ်ႈ ၶဝ်ႈၼႂ်းပပ်ႉသဵၼ်ႈမၢႆႁူဝ်ႁိူၼ်း/ ထပႅၼ်းဝၢၼ်ႈ (ထေႃးရေႃး 14) လႄႈ ႁဵတ်းပၼ်ဝႂ်ၵပ်းတူဝ် ဢၼ်ဢမ်ႇၸႂ်ႈၵူၼ်းထႆး မၢႆ (8) ၼႂ်းၶၢဝ်းတၢင်း (1) ဝၼ်း။
6. တေၸၢင်ႈၸႂ်ႉၶၢဝ်းယၢမ်းႁဵတ်းမွၵ်ႈ (5) ဝၼ်း။

ဢေႇၵသၢၼ်ဢၼ်လူဝ်ႇလႆႈႁၢင်ႈႁႅၼ်း

1) ၽိုၼ်မိူၼ် ထေႃးရေႃး 38 ข။

2) ဝႂ်ၵပ်းတူဝ်ၸဝ်ႈၵဝ်ႇ။

3) ဝႂ်ပိုၼ်းၵႅပ်ႈ/ ထပႅၼ်းပရဝတ်ႇ ပႅပ်ႇ 89။

4) သင်ၸဝ်ႈၵဝ်ႇ ယၢမ်ႈတူၵ်းၶွၵ်ႈပူၼ်ႉ 5 ပီၼႆ တေလႆႈမီး ၽိုၼ်လိၵ်ႈၶေႃႈတႅပ်းတတ်းလုမ်းတြႃး၊ ဝႂ်ႁပ်ႉႁွင်းၶတီႊ လႄႈ ဢေႇၵသၢၼ် လွင်ႈပူၼ်ႉလွတ်ႈဢွၵ်ႇၶွၵ်ႈ။

ဢွင်ႈတီႈယိုၼ်ႈယွၼ်း (သထၼ)

• သင်ဝႃႈမီးတီႈယူႇ ၼႂ်းၵုင်းထဵပ်ႈ ၵႂႃႇယိုၼ်ႈတီႈၵုင်းထဵပ်ႈ။
• သင်ဝႃႈယူႇတီႈၼႂ်းၸႄႈတွၼ်ႈၼႆ ယိုၼ်ႈတီႈၼၢႆးဢမ်းၽိူဝ်း၊ ၽူႈၵွၼ်းၸႄႈဝဵင်း တီႈၸဝ်ႈၵဝ်ႇမီးသဵၼ်ႈၸိုဝ်ႈဝႆႉၼၼ်ႉ။

ယိုၼ်ႈယွၼ်းလႆႈ တင်ႈတႄႇဢဝ်ဝၼ်းထီႉ 30/06/2025