ပၢင်ႁူပ်ႉထူပ်းၽူႈထွမ်ႇငိၼ်း ႁူင်းပွႆႇသဵင်မႅပ်ႇရေႇတီႇဢူဝ်ႇ 

ႁပ်ႉထွမ်ႇသဵင်ၵၢင်ၸႂ် လႄႈ တၢင်းလူဝ်ႇ ၽူႈထွမ်ႇငိၼ်း 

မိူဝ်ႈဝၼ်းထီႉ 18 လိူၼ်ဢွၵ်ႇထူဝ်ႇပႃႇ ပူၼ်ႉမႃးၼႆႉ ႁူင်းပွႆႇသဵင်မႅပ်ႇရေႇတီႇဢူဝ်ႇ FM 97.5 MHz ၵဵင်းမႆႇ လႆႈၽိတ်ႇမွၵ်ႇဢဝ် ၽူႈထွမ်ႇငိၼ်း ႁူင်းပွႆႇသဵင်မႅပ်ႇရေႇတီႇဢူဝ်ႇ မႃးႁူပ်ႉထူပ်းၵၼ်၊ ပၢင်ႁူပ်ႉထူပ်းၽူႈထွမ်ႇငိၼ်းၼႆႉ မီးတိုဝ်ႉတၢင်း လႆႈဢုပ်ႇၶႆႈၼႄ တူဝ်ထူပ်းၽူႈထွမ်ႇငိၼ်း ၼႂ်းၵၢၼ်ႁပ်ႉထွမ်ႇၶေႃႈမုၼ်းၶၢဝ်ႇငၢၼ်း ႁူင်းပွႆႇသဵင်မႅပ်ႇ လႄႈ ဢုပ်ႇဢူဝ်းလႅၵ်ႈလၢႆႈ ၼင်ႇႁိုဝ် ႁူင်းပွႆႇသဵင်တေ တေၸၢင်ႈသိုပ်ႇၽိုၼ်ၽႄ ၶေႃႈမုၼ်းၶၢဝ်ႇငၢဝ်း ဢၼ်ႁႅင်းၵၢၼ်လူဝ်ႇတေႉတေႉ ၼႂ်းမိူဝ်းၼႃႈၼၼ်ႉ။  

ၼႂ်းပၢင်ႁူပ်ႉထူပ်းၼႆႉ ၽူႈၶဝ်ႈႁူမ်ႈၶဝ် ဢုပ်ႇဢူဝ်းၶႆႈၼႄဝႃႈ – ႁႅင်းၵၢၼ်ၼႂ်းမိူင်းထႆးၼႆႉ လူဝ်ႇၶေႃႈမုၼ်းၶၢဝ်ႇငၢဝ်း ဢၼ်ၸိုဝ်ႈၸႂ်ႈမၢၼ်ႇမႅၼ်ႈ ၶိုတ်းတၼ်း လႄႈ ယုမ်ႇယမ်လႆႈတေႉတေႉ။ ယွၼ်ႉဝႃႈ ၶေႃႈမုၼ်း လွင်ႈသုၼ်ႇလႆႈသုၼ်ႇပဵၼ် ႁႅင်းၵၢၼ်၊ ပၵ်းပိူၵ်မၢႆမီႈႁႅင်းၵၢၼ် ၸိူဝ်းၼႆႉ ပဵၼ်ၶေႃႈမုၼ်းလွင်ႈယႂ်ႇတႃႇၸိူဝ်းၶဝ်တေႉတေႉ  ၼႆယဝ်ႉ။  

လိူဝ်ၼၼ်ႉ ၽူႈမႃးၶဝ်ႈႁူမ်ႈပၢင်ႁူပ်ႉထူပ်းၶဝ် ယင်းသိုပ်ႇၶႆႈၼႄ ပၼ်တၢင်းႁၼ်ထိုင် တီႈႁူင်းပွႆႇသဵင်မႅပ်ႇရေႇတီႇဢူဝ်ႇဝႃႈ လိူဝ်သေ လၢႆးၵၢၼ်ဢၼ်လၢတ်ႈလွင်ႈ သုၼ်ႇလႆႈသုၼ်ႇပဵၼ်၊ လွင်ႈဝတ်းဝႂ်ယဝ်ႉ လၢႆၵၢၼ်ထမ်ႇမတြႃး၊ လၢႆးၵၢၼ် ပၼ်တၢင်းႁူႉတႃႇၵူၼ်းၼုမ်ႇ သႅၼ်းႁုၼ်ႈမႂ်ႇ၊  လၢႆးၵၢၼ်ပၼ်တၢင်းႁူႉ တႃႇမေႃယူႇသဝ်းၸွမ်းၵၼ်ၵႂႃႇ ၼႂ်းတူင်ႇဝူင်းႁဝ်း မူၼ်ႈမူၼ်ႈသိူဝ်းလႆႈ ၸိူဝ်းၼၼ်ႉၵေႃႈ မီးၽွၼ်းလီတႃႇ ၸိူဝ်းၶဝ်တေႉတေႉ ၼႆယဝ်ႉ။  

ၶေႃႈဢုပ်ႇဢူဝ်း လႄႈ ၶေႃႈၼႄႉၼမ်း ပၼ်တၢင်းႁၼ်ထိုင် ဢၼ်ၽူႈထွမ်ႇငိၼ်းၶဝ် ဢုပ်ႇဢူဝ်းလႅၵ်ႈလၢႆးမႃး ၼႂ်းပၢင်ႁူပ်ႉထူပ်းၼႆႉ ပိူင်းၼႄဝႆႉဝႃႈ ႁူင်းပွႆႇသဵင်ဢၼ်ဝႃႈၼႆႉ ဢမ်ႇၸႂ်ႈဝႃႈ ပဵၼ်တီႈပွႆႇၶၢဝ်ႇငၢဝ်း ပိူင်လဵဝ်၊ ပဵၼ်ပႃးတီႈပိုၼ်ၽႄပၼ်တၢင်းႁူႉ၊ တီႈပၼ်တၢင်းၸွႆႈထႅမ် လႄႈ ႁဵတ်းႁႂ်ႈတူင်ႇဝူင်းႁႅင်းၵၢၼ် တိူဝ်းၸမ်ၸႂ်ၵၼ်မႃးလႆႈ ၼႆယူႇယဝ်ႉ။  

❤️ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ၽူႈမႃးၶဝ်ႈႁူမ်ႈ ပၢင်ႁူပ်ႉထူပ်း ၽူႈထွမ်ႇငိၼ်းၵူႈၵေႃႉတေႉတေႉၶႃႈ။ ၶေႃႈပၼ်တၢင်းႁၼ်ထိုင် ဢုပ်ႇဢူဝ်းလႅၵ်ႈလၢႆႈမႃးၸိူဝ်းၼၼ်ႉၵေႃႈ ပဵၼ်ႁႅင်းၵမ်ႉယၼ် တႃႇႁႂ်ႈႁူင်းပွႆႇသဵင်မႅပ်ႇရေႇတီႇဢူဝ်ႇႁဝ်းၶႃႈ သိုပ်ႇၶတ်းၸႂ်ႁႂ်ႈတိူဝ်းလီလိူဝ်ၼႆႉ ၵႂႃႇမိူဝ်းၼႃႈတေႉတေႉဢေႃႈ။  

MAP Radio – Voice Without Border  #MAPRadio #MAPFoundation #MigrantWorkers #LabourRights #MigrantVoices #CommunityRadio #MigrantRights #HappyFamily #Dhamma #ListenerFeedback #ႁူင်းပွႆႇသဵင် #မႅပ်ႇရေႇတီႇဢူဝ်ႇ